Bu nədir?! Uşaqlar üçün yazılmış hekayəmi, ibrətli povestmi, yoxsa motivasiya, ya da fəlsəfə kitabımı? Kitabı oxuyanlar bunu dəqiq bilməsələr də, bircə onu bilirlər ki, müəllif möhtəşəm bir əsər yaradıb; böyükdən-kiçiyə hər kəsin oxuyub özünə bir pay götürəcəyi əsər.
Kitabın çapından 18 nəşriyyat imtina etmişdi, yalnız bir nəşriyyatın tərəddüdlə çap etməsindən qısa müddət sonra nəinki Amerikada, hətta dünyada belə bestsellerə çevrildi.
Təsadüfi deyil ki, bu əsər “oxunulması vacib olan kitablar” siyahısında ön sıralarda yer alır. Riçard Bax istedadlı miniatür rəssam kimi, az sözlə çox dəyərli və vaxt keçdikcə bu dəyəri artan bir əsər meydana çıxarmağı bacarıb.
Bu kitab bir Qağayının mübarizə hekayəsidir; məhdudiyyətlərlə, “olmaz”larla barışmayan, yalnız yemək üçün uçmaq istəməyən, daim yüksəklərə can atan və nəhayət, buna nail olan bir Qağayının, həm də hər birimizin daxilində yaşayan gerçək Qağayının...